Sohoka muri Baburoni kuko igiye kurimbuka

Mu gitabo c’Ivyahishuwe, ibikorwa vy’ubushobozi bw’umwiza bivugwa nk’ivyigana ibikorwa vy’Imana. Nk’akarorero, Imana ifise abamalayika batatu batangaza ubutumwa bwiza kw’isi yose (Ivyahishuwe 14: 6-12). N’igisato naco gifise impwemu zitatu z’abadayimoni zigenda ku bami bo kw’isi ngo zibakoranirize ku ntambara ya nyuma yo kugwanya Umwagazi (Ivyahishuwe 16: 13, 14).

abantu benshi bugaranywe

Ubutumwa bw’umumalayika wa kabiri bushimikira kur’ubwo buryo bwo kwiyumvira. Imana irafise igisagara, igisato naco ciremera igisagara caco Akaranga n’intumbero vy’igisagara ca kera ca Babuloni uyu musi bikoreshwa nk’akarorero ka Babuloni yo mu gihe c’iherezo.

Mu Vyahishuwe, Babuloni igereranya ubutatu buhumanye. Igizwe n’ubushobozi butatu bwishira hamwe kugira ngo bashire mu ngiro integuro y’umukerubi yaguye (Ivyahishuwe 16: 13). Ni igisato, gisa naho gifata ikibanza c’Imana (nk’akarorero Ivyahishuwe 13 :2, 4); igikoko kiva mu kiyaga, kenshi cigana Kristo (nk’akarorero, Ivyahishuwe 1 :8; 13 :14); hamwe n’igikoko kiva mw’isi, citwa kandi umuvugishwa w’ibinyoma, gikora ibikorwa vya Mpwemu (nk’akarorero Ivyahishuwe 13 :13; 19: 20).

Mu nsiguro ya kahise k’ubuhanuzi bwo mu Vyahishuwe, igikoko ciburuka kivuye mu kiyaga kigereranya ishengero rya gikristo ryo mu gihe c’umwiza; igikoko kiva mw’isi kigereranya ubuprotestanti bwo muri Amerika; hamwe n’igisato kigereranya kuvugana n’imizimu- bishingiye ku ciyumviro c’ubupagani c’ukudapfa kw’umushaha, biciye mur’ico Satani azokora ibitangaza vy’ubuhendanyi (Ivyahishuwe 16 :13, 14).

Ubwa kabiri, Babuloni n’imvugo isigura uko ubukristo bwahakanye bwo mu gihe c’iherezo buzoba bumeze kw’isi yose. Ni igice kimwe c’ishengero rya Lawodikiya canse kwumvira umuhamagaro wa Kristo ngo bugurure urugi bagaruke kuri we (Ivyahishuwe3: 14-22). Kuko ari umutunzi (Ivyahishuwe 18 : 3, 11-13) kandi rifise amakanzu meza (imirongo ya 16, 19), ntibakeneye kuronka ubutunzi hamwe n’ikanzu Kristo atanga ku bantu bose- ubutunzi bwo mu butumwa bwiza (Ivyahishuwe 3 :18). Ibikoko bigize Babuloni s’ibikoko bizana agatotezo mu vy’imibano canke ivy’ubutunzi mur’iki gihe c’iterambere, ariko n’imvugo ikoreshwa mu kuvuga ubukristo bwahakanye Imana buzogwanya ubwoko bw’Imana bwo mu gihe ca nyuma (Ivyahishuwe 13 :15).

Ubwa gatatu, Babuloni itegera ikiganza isi ifise ubutumwa bw’agakiza k’ikinyoma. “Yanywesheje amahanga yose vino niyo burake bw’ubushakanyi bwayo” (Ivyahishuwe14 :8). Inguvu Babuloni ifise n’uburake, ivyipfuzo si impwemu imurikiwe na Mpwemu w’Imana. Mu gutanga vino y’ubusambanyi mu vya mpwemu, Babuloni ica ivugwa nk’umugore yataye ibanga, ivyerekana ukutaba umwizigirwa ku Mana. Mw’isezerano rya kera, uguta ibanga kwa Isirayeli igaheba Imana vyatuma isirayeri yiyunga n’ayandi mahanga kugira ngo yikingire (Ezekiyeli 16 :26-29) hamwe no kwemera imigirwa n’ivyizerwa vy’ayandi mahanga. (Yeremiya 2 :20, 21; Ezekiyeli 6 :9, 16, 23). Mur’izo nzira zibiri zose havugwa ubuhakanyi (Zaburi 106: 35-39). Mu Vyahishuwe, Babuloni irondera imfashanyo y’abami b’isi (Ivyahishuwe 17 :12, 13) kandi ishigikira ubuhendanyi no gusenga igisato (Ivyahishuwe 13 :4). Ubwa kane, mu ntambuko zo kurema Babuloni yo mu gihe c’iherezo, igisato kiramvurira ikiganza isi y’abapagani kugira ngo kibahurize ku vyiyumviro vy’ubukristo bwaguye. N’igikorwa kitoroshe kuko isi yuzuye ibihumbi n’ibihumbi vy’amadini, n’ubutegetsi bwa politike benshi badacana uwaka, ivyiyumviro bitandukanye, abatemera Imana n’abavugako ata na kimwe bemera. Uburyo rero bushoboka cane ku gisato kugira ngo gishikire intumbero zaco n’ugukoresha ibintu birengeye ugutahura kw’abantu.

Nta kindi coshobora guhindura ubwizigirwa bw’abantu nko kubona ibintu birengeye ugutahura kwabo bisa nk’aho ata muntu yoshobora kubihakana. Ivyahishuwe biravugako hazoba ibitangaza bikomeye bivuye ku gisato no kubakozi baco bizotuma haba amahinduka mu vy’imibano mu vya politike no mu vy’amashengero yo mw’isi, ivyo uyu musi, umuntu atokwigera yiyumvira ko vyoshoboka (Ivyahishuwe 13 :13, 14).

UGUTSINDA KW’UMWAGAZI

N’ibiki mu buryo budasanzwe Babuloni ishikiriza isi? Babuloni ishikiriza inzira yayo bwite y’agakiza mu gutangaza igisa n’ubutumwa bwiza ataribwo. Imana iha isi ubutumwa bwiza bw’agakiza binyuze mu Mwagazi, ariko Babuloni yoyo ishikiriza isi vino. Vino kenshi na kenshi n’ikimenyetso c’umuhezagiro w’agakiza k’Imana ku bantu bayo. Babuloni ishikiriza abigishwa bayo vino y’ “umuhezagiro w’agakiza kayo bwite,” iyo nayo ni ubushakanyi bwayo. Mw’isezerano rya kera, vino yitwa “amaraso y’inzabibu” (nk’akarorero Gusubira mu vyagezwe 32 :14), ikigereranyo ciza cane c’amaraso/ ubuzima bwa Yesu. Igihe Yesu yasangira n’abigishwa biwe, yabahaye vino yagereranya ubuzima bwiwe bwatanzwe kugira ngo ivyaha bibabarirwe (Matayo 26 :28)- inkuru nziza yo mu butumwa bwiza.

Mu butumwa bwizabwanditswe na Yohana, Yesu yatanze amaraso yiwe nk’isoko yonyene y’ubuzima ku banyavyaha (Yohana 6 :53, 54; Yohana 19 :34). Mu guha abantu bo kw’isi vino yayo, Babuloni itanga igisa n’ubutumwa bwiza ataribwo, ubutumwa bwiza bw’icitiriro, busa n’ubwemezwa n’ibitangaza bidasanzwe bikorwa n’igisato hamwe n’abakozi baco (Ivyahishuwe 13: 13, 14; 16: 13, 14). Ubwo butumwa bwiza bw’icitiriro bwitwa “vino…ni kuvuga irari ry’ubushakanyi bwayo [inyigisho z’ubuhakanyi]” (Ivyahishuwe 14 :8).

Ni ukwonona integuro y’Imana ku kiremwa muntu, ni kuvuga ko ari ubusambanyi/ ukwononekara mu vya Mpwemu. Ikiremwa muntu kizoba gihanzwe n’iryo gongagongana ry’ubutumwa bwiza bw’agakiza kabonerwa muri Kristo hamwe n’icitiriro c’ubutumwa bwiza ataribwo bw’agakiza gatangwa n’igisato/umukerubi yaguye. Ikizohereza gushika n’ugusambuka kwa Babuloni. Iryo sambuka rizoba mu biringo bibiri kandi mu buryo bubiri. Ubwa mbere ni mu buryo bw’impwemu ubu nabwo buza bwaratanguye n’ubu burabandanya. Ariko buzoshika ku ndunduro igihe ubuhakanyi bwatanguranye n’ukuvuka kw’ishengero buzoshika kw’isonga ryabwo mu gushira hamwe ubukristo bwaguye. Babuloni ntiruzuza igikombe cayo gushika kuri urwo rugero, ku buryo ikintu nk’ico coshika.

Ukugwa kwa kabiri kuzoba igihe Kristo azoba agarutse kandi bizoshikana ku gusamburwa burundu kwa Babuloni. Yohana avuga ko ico gihe, “Igisagara gihambaye [Babuloni] cari cagabuwemwo ibice bitatu” (Ivyahishuwe 16:19). Ubutatu buhumanye ntibushobora kuguma bwiyunze imbere y’Umwagazi (raba Itanguriro 11 :8). Si igitero c’Intare gitsinda [ubutatu buhumanye], ariko mumaso h’uwatanzwe hamwe n’igikorwa c’Umwagazi yishwe kubw’ivyaha vyacu. Umwagazi niwe ubutumwa bwiza bugereranya kandi niwe ava mu ntambara atsinze.

INDUNDURO

Babuloni ntirigaragaza kw’isi mu buryo bunengesereye. Nk’uko twamaze kubivuga, ubuhakanyi bwatanguye kera mw’ishengero ry’Ubukristo kandi buzoshikira kw’isonga ryabwo imbere gato y’uko Yesu agaruka (2 Ab’i Tesalonika 2 :1-10). Birahambaye kuri twebwe kwama twihweza ibija biraba mu migenderanire y’Abaporotesitanti n’Abagatorika, na cane cane ukwiyongera kudasanzwe kw’ubwaku bw’Abagatorika mu bice bimwe bimwevy’isi, ndetse no mu migenderanire iterekeye ivy’idini. Isi irahindagurika vuba cane kandi dutegerezwa kwitega amahinduka ahambaye cane, na cane cane mu vy’amadini.

Mu kurindira, n’inshingano yacu gutangaza ubutumwa bwiza bwa Yesu Kristo nk’inzira yonyene ituronkesha agakiza, kandi twongera tuburira isi ku bigiye kudushikira. “Turashobora kuvuga bike mu mirongo imw’imwe ku vyerekeye ubupapa n’ubutware bwa Roma, ariko dutegerezwa gukangurira abantu kuvyo abahanuzi n’intumwa banditse bayobowe na Mpwemu w’Imana.” (Ellen G. White, Conseils aux écrivains et éditeurs, p.65)